Eposoft ရာသီကိုင်လက္ခဏာတွေအတွက်

Eposoftဆိုတာ အမျိုးသမီးများ ရာသီနဲ့ပက်သက်တဲ့ ဝေဒနာတွေအတွက် အသုံးပြုနိုင်တဲ့ သဘာဝဆေးဖက်ဝင် အပင်နဲ့ ပြုလုပ်ထားပြီး Zifam ကုမ္ပဏီက ထုပ်လုပ်ထားတဲ့ဆေးတမျိုးပါ။

Eposoft ထဲမှာ ဘာပါသလဲ။ 

-Evening primrose oil(gamma linolenic acid)    1000mg(100mg)

-Natural vitamin E(d-alpha tocopherol)                      5mg(7.5 IU)

နှစ်မျိုး ပေါင်းစပ် ပါဝင်ပါတယ်။

evening primrose ကို မြန်မာလို ညနေခင်းနှင်းဆီခေါ်ပါတယ်။ညနေပိုင်း နေညိုချိန် မှာပွင့်လန်းပြီး နေထွက်လာရင်ခြောက်သွေ့တာကြောင့် ဒီလိုနာမည်မျိုးပေးထားပါတယ်။ မြောက်အမေရိက၊ ကနေဒါ၊အနောက်ဥရောပနိုင်ငံတွေမှာ အဓိကတွေ့ရပြီး လှပတဲ့ ပေါင်းပင်တမျိုး ဖြစ်ပါတယ်။ 

အစေ့က ၅ စင်တီမီတာ ရှိပြီး အစေ့ကိုကြိတ်လို့ရတဲ့အဆီက အသုံးဝင်ပါတယ်။ အလှပစ္စည်းအဖြစ် အသုံးကျသလို ဆေးဖက်လဲဝင်တယ်။ 

-အသားအရည်ကို နူးညံ့ပျော့ပျောင်းစေပြီး အစိုဓာတ်ကို  ထိန်းသိမ်းပေးတယ်။

-ခန္ဓာကိုယ်အတွက်လိုအပ်တဲ့ unsaturated fatty acid ကို ပေးစွမ်းနိုင်တယ်။ 

ညနေခင်းနှင်းဆီရဲ့ အဆီထဲမှာ linolenic acid နဲ့ gamma linolenic acid တို့ ပါဝင်ကြပါတယ်။ 

-linolenic acid က နှလုံး၊ ဆီးချို၊ ကင်ဆာ တွေကို ကာကွယ်နိုင်ပါတယ်။ 

-gamma linolenic acid က ရောင်ရမ်းတာကို ကျဆင်းစေတာကြောင့် ပန်းနာသမားတွေ၊ အဆစ်ရောင်သူတွေနဲ့ သင့်တော်တယ်လို့ ဆိုပါတယ်။

-ဖက်တီးအက်ဆစ် ဓာတ်တိုးမှုကို ဆန့်ကျင်ဖို့အတွက် vitamin E(ဓာတ်တိုးဆန့်ကျင်ပစ္စည်း)ကို ထည့်သွင်းပေးထားတယ်။

Eposoft က ဘယ်လိုနေရာတွေမှာ အသုံးကျသလဲ။

-အမျိုးသမီးတွေ ရင်သားတင်းပြီး နာကျင်တဲ့အခါ၊

-ရာသီနဲ့ပတ်သတ်ပြီး ခံစားရတဲ့ ဗိုက်နာ၊ ဗိုက်အောင့် ဝေဒနာတွေ၊

-ဝက်ခြံ၊နှင်းခူနာလို အရေပြားရောဂါတွေ၊

-အရိုးပွတာ၊အဆစ်ရောင်သူတွေ၊

-ပန်းနာရင်ကျပ်သမားတွေ၊

-ကိုယ်အလေးချိန် ထိန်းညှိလိုသူတွေ၊

-အသားအရည်ကိုသာမက ဆံပင်၏ ကောင်းခြင်းနှင့် ပြည့်စုံစေတယ်လို့ ဆိုထားတယ်။

ဆီးချိုသမားတွေ အာရုံကြောလေးလံထိုင်းမှိုင်းတာ အတွက်လည်း အဆင်ပြေတယ်လို့ ဆိုတယ်။ အမျိုးသားတွေ ပန်းသေပန်းညှိုးအတွက်လည်း အသုံးဝင်တယ်လို့ ရေးထားတယ်။ကိုယ်ဝန်ဆောင်စဉ်သုံးရင် ကိုယ်ဝန်ဆိပ်တက်တာကိုပါ ကာကွယ်ပေးတယ်။ ကလေးမွေးဖွားတဲ့အခါ လွယ်ကူချောမွေ့စေပြီး နေ့စေ့လစေ့မွေးဖွားစေတယ်လို့ ဆိုသေးတယ်။

အင်္ဂလန်နိုင်ငံမှာ ရင်သားနာကျင်တာနဲ့ နှင်းခူနာ အရေပြားရောဂါကို ကုသဖို့ပေးကြတယ်။ သို့သော် အမေရိကားမှာ evening primrose oilပါတဲ့ ကုန်ပစ္စည်းတွေကို လုံလောက်တဲ့ trial resultတွေမရှိတဲ့အတွက် သတိပေးထားတယ်။ သေချာတာတော့ လုံလောက်တဲ့ trial စမ်းသပ်မှုတွေ မရှိသေးတာကြောင့် သတိထားသုံးစွဲသင့်ပါတယ်။ ဆေးသောက်သင့်၊ မသောက်သင့်မေးရင်တော့ လိုအပ်တဲ့အခါ သောက်သုံးနိုင်ပါတယ်လို့ပဲ ဆိုပါရစေ။ဘေးဥပါဒ်ကြီးကြီးမားမားရှိတယ်လို့ သက်သေမပြနိုင်တဲ့အတွက် သောက်လိုက သောက်သုံးနိုင်ပါတယ်။

ဘယ်လိုသောက်သုံးရမလဲ။

-ပုံမှန်အားဖြင့် တစ်လုံး တစ်ကြိမ်ကို နေ့စဉ် သောက်ပေးနိုင်တယ်။

-အဆစ်အမြစ်ရောင်သူတွေ၊ မီးယပ်လက္ခဏာတွေအတွက် တနေ့ နှစ်ကြိမ်၊ ခြောက်လခန့် သောက်သုံးသင့်တယ်။ နောက်ပိုင်းမှာ သက်သာရင် သက်သာသလို ဆေးကို လိုတိုးပိုလျော့ လုပ်ပေးနိုင်တယ်။

-ဆီးချိုသမားတွေ တစ်လုံး(သို့) နှစ်လုံးကို တနေ့ နှစ်ကြိမ် သောက်သုံးသင့်တယ်။ 

-ရင်သားနာကျင်တတ်သူတွေ နှစ်လုံး နှစ်ကြိမ် သောက်သုံးပေးနိုင်တယ်။

-အရေပြားရောဂါသည်(နှင်းခူနာ)တွေမှာ တနေ့ နှစ်ကြိမ်၊ တခါသောက် နှစ်လုံး သောက်သုံးပေးရမယ်။

-အရိုးပွသူတွေကိုပေးလိုပါက ကယ်ဆီယမ်၊ငါးကြီးဆီနဲ့ တွဲဖက်ပေးသင့်ပါတယ်။

-အသားအရည် လှချင်သူများ တစ်လုံး တစ်ကြိမ် သောက်သုံးနိုင်တယ်။

ဘေးထွက်ဆိုးကျိုး ဘာတွေရှိလဲ။

အများအားဖြင့် စိတ်ချရတယ်။ တခါတရံ ပျို့တာ၊ အန်တာ၊ အစာမကြေတာမျိုး ရှိတတ်တယ်။

အတူတွဲ မသောက်သင့်တဲ့ဆေးတွေ။

-colchicine ဂေါက်ရောဂါဆေးတွေ၊

-procarbazine ကင်ဆာကြိတ်ပျောက်ဆေး၊

-heparin သွေးကျဲဆေး၊

ဒေါက်တာ အေးမင်းထူး

၁၈.၂.၁၃