Friday, March 20, 2015

အောက်မျက်ခမ်းက အဖုလေးတွေ ပျောက်အောင်


ဆရာရှင့်၊
ညီမမျက်လုံးအောက်(အောက်မျက်ခမ်း) အရေပြားတဝိုက်မှာအဖုသေးလေးတွေရှိပါတယ်။ ယားတာ၊နာတာ၊ကြီးလာတာမရှိပါဘူး၊ သိချင်တာကဘာရောဂါဖြစ်တာပါလဲ ၊ပျောက်ကင်းအောင်ဘယ်လိုလုပ်ရမလဲ၊ကူညီပေးပါဦးနော်။
လေးစားစွာဖြင့်



ဓာတ်ပုံပါတခါတည်းပို့လိုက်တာ ကောင်းပါတယ်။ တွေ့တာကို ပြောရရင် Syringomaဆိုတဲ့ အရေပြားရောဂါတမျိုးဖြစ်နိုင်ပါတယ်။ ကင်ဆာမဟုတ်တဲ့ benign bump အရေပြားရောဂါတမျိုးပါ။ ပါးပြင်အထက်ပိုင်းနဲ့ မျက်ခွံအောက်ပိုင်းနေရာမျိုးမှာ အတွေ့များတယ်။ တဖက်မှာဖြစ်ရင်နောက်တဖက်မှာလည်းဖြစ်နိုင်တယ်။တံတောင်၊ရင်ဘတ်၊ဆီးစပ်တွေမှာလည်း ဖြစ်ကြတယ်။ ဖြစ်တဲ့နေရာက နာတာ၊ယားတာမရှိတတ်ဘူး။ အစုလိုက်ဖြစ်တတ်သလို တလုံးချင်းလည်း ဖြစ်နိုင်တယ်။ iceberg သဘော အပေါ်မှာမြင်ရသလို အောက်ခြေမှာလည်းဖောင်းနေတတ်တယ်။ ဘာ့ကြောင့်ဖြစ်လဲမေးရင် ချွေးဂလင်းရဲ့ ပြွန်မှာ ဆဲလ်တွေပုံမှန်ထက်ပွားများလာပြီး ပိတ်သွားတဲ့အခါ အဖုသေးလေးတွေ ဖြစ်လာပါတယ်။ ဒါ့ကြောင့်ဖြစ်တဲ့ရောဂါဟာ ချွေးဂလင်းပိတ်လို့ ဖြစ်ရတာပါ။မျိုးရိုး၊စိတ်ဖိစီးမှုတွေကြောင့် ဖြစ်တတ်ပြီး အပျိုဝင်စကနေ သက်လတ်အရွယ်တွေထိဖြစ်နိုင်တယ်။ အမျိုးသမီးတွေမှာ ပိုတွေ့ရတယ်။သိစေချင်တာက ဝက်ခြံလို အဆီဂလင်းပိတ်တာမဟုတ်ဘူး။ ညှစ်တာ၊ခွဲစိတ်တာမလုပ်သင်ဘူး။လိမ်းဆေး bichloroacetic acid(BCA)လိမ်းပေးနိုင်တယ်။ ဆေးကအလုပ်ဖြစ်ရင် ၁ပတ်အတွင်း သိသာလာတယ်။ မရရင်နောက်တနည်း လျှပ်စီးကြောင်းသုံးပြီး ဖျက်ဆီးနိုင်တယ်။ electrocauteryခေါ်တဲ့ လျှပ်စစ်ချောင်းငယ် probeသုံးပြီး ဖျက်ဆီးနိုင်တယ်။ အရေပြားဆရာဝန်ကသာပြုလုပ်ပေးတယ်။ အမာရွတ်၊အမဲစက်ကျန်တတ်တယ်။လက်ဆအနည်းအများက စကားပြောတယ်။ အရေပြားဆရာဝန်တချို့ကိုသွားပြရင် carbon dioxide laserလုပ်ပေးနိုင်မယ်ထင်ပါတယ်။တချို့ကလေဆာဖြစ်လို့ ကြောက်ကြတယ်။ဘာမှမလုပ်ဘဲထားရင်လည်းပြဿနာကြီးကြီးမားမားမရှိပါဘူး။ကင်ဆာကိုလည်း မဖြစ်စေနိုင်ဘူး။ စိတ်ဒုက္ခတော့နည်းနည်းရောက်တာပေါ့။

ဒေါက်တာ အေးမင်းထူး
၁၂.၂.၁၄

No comments:

Post a Comment